Bedieninge

Kalendar

Ons kalender bevat al die datums en tye van ons bedieninge, spesiale geleenthede en dienste. Besoek dit gerus om op hoogte te bly en saam met ons te beplan vir ’n lewende en aktiewe gemeentelike lewe.

Eredienste

Die kern van kerkwees is die verkondiging van God se Woord. Die Woord van God is die sentrale manier waardeur God sy kerk opbou en laat groei na die beeld van Jesus Christus. Dit vind elke Sondagoggend om 10:00 plaas deur ’n eksegetiese preek. In die middag om 17:00 word dit verder verdiep met ’n leerdiens uit ons belydenisskrifte.

Bybelstudie en Biduur

Die gemeente word nie net op Sondag gevorm nie, maar ook deur volgehoue luister na die Woord en gebed deur die week. Daarom ontmoet ons elke Woensdag om 18:30 vir Bybelstudie en gesamentlike gebed. Hierdie tyd is ’n kosbare geleentheid om die Skrif dieper te leer ken en saam in afhanklikheid voor die Here te buig. Kom groei saam in die Woord van God en in gebed!

Huisbesoek en dissipelskap

Die hartklop van ’n gesonde gemeente is pastorale bediening. Persoonlike aandag en dissipelskap is noodsaaklik om elke lidmaat te ontmoet waar hy is en te help groei in Christus. Omdat die gesin die fondament van die verbondsgemeenskap is, speel gereelde huisbesoeke ’n belangrike rol in die ondersteuning van lidmate en gesinne. Daarom is ons gemeente in wyke verdeel, elk met ’n verantwoordelike ouderling wat gereeld huisbesoeke aflê.

Lidmaatskapklasse

Vir almal wat lidmate van ons gemeente wil word of meer oor die basiese leer van die Skrif en ons belydenisskrifte wil leer, bied ons lidmaatskapklasse aan Woensdae om 17:30. Dit is ’n uitstekende geleentheid om die Here se verbond en die roeping van die kerk beter te verstaan.

Katkisasie vir Hoërskoolkinders

Ons glo dat geloofsonderrig ’n belangrike deel van ons roeping is. Ons hoërskool-katkisasieklasse vind plaas Sondae om 9:00, waar jongmense toegerus word in die fondament van die Christelike geloof.

Sondagskool vir Voorskool en Laerskool

Ons kinders leer reeds van kleins af om die Here te ken en lief te hê. Sondae om 9:00 is daar Sondagskoolklasse vir voorskoolse en laerskoolkinders, waar hulle op ’n vreugdevolle en Bybelse manier onderrig word.

Manne-groep

Elke eerste Saterdag van die maand om 10:00 ontmoet ons manne vir Bybelstudie, gebed en bemoediging. Hier word manne toegerus om hul plek in die huis, kerk en samelewing as Christelike leiers in te neem.

Vroue Bybelstudie

Ons vroue kom elke tweede Donderdag van die maand om 10:00 bymekaar vir studie van die Woord en gesamentlike versterking. Dit is ’n kosbare tyd van groei, vriendskap en geestelike verdieping.

Evangelisasie

Ons glo dat die evangelie die krag van God is tot redding van elkeen wat glo. Dit bevry en verander mense en gemeenskappe soos Wesbank wat vasgevang is in verslawing en bendegeweld. Daarom neem ons elke Saterdag om 10:00 die goeie nuus van Jesus Christus na die strate van ons gemeenskap.

Gemeente-ete en gemeenskap van die heiliges

Elke tweede maand, ná die viering van die nagmaal, kom die gemeente saam om in eenvoud rondom tafels te eet en mekaar te dien. Terwyl ons mekaar met kos en gesprek bedien, beleef ons prakties die gemeenskap van die heiliges wat die Here aan sy kerk skenk. So vloei die gemeenskap rondom die tafel van die Here oor in sigbare, warm gemeenskap met mekaar, tot eer van Christus en tot opbou van sy liggaam.

Koffiedrink

Elke tweede Sondag drink ons om die beurt tussen die oggend- en middagdiens saam koffie. Dit is ’n tyd om stil te staan, na mekaar te luister en kennis te neem van mekaar se lewens, sodat ons mekaar kan ondersteun en werklik by mekaar betrokke kan wees.

Sopkombuis

As deel van ons diens aan die gemeenskap bied ons elke tweede Donderdag om 14:00 ’n sopkombuis aan. Hier voorsien ons nie net warm maaltye aan behoeftiges nie, maar deel ons ook die hoop van die evangelie. Vooraf word ’n kort evangelieboodskap gebring, waarna daar vir die mense gebid word.

Barmhartigheidsdiens & Noodhulp

As deel van ons diens aan ons gemeenskap gee ons noodhulp-pakkies uit aan lidmate en besoekers wat tydens uitdagende tye hulp nodig het. Hierdie pakkies bevat basiese items wat help om broodnodige ondersteuning — soos kos en ander noodsaaklike produkte — te voorsien. Ons sien dit as ’n geleentheid om Christus se liefde in woord en daad te deel.

Kerk Skoonmaak

Ons sien ons kerkgebou as ’n geskenk uit God se hand. Daarom kom ons elke Vrydag om 9:00 bymekaar om die kerkgebou skoon en netjies te hou – ’n praktiese manier om saam diensbaar te wees.

Afsluiting

Ons bedieninge is geleenthede om saam as gemeente die Here te dien, mekaar op te bou en ’n lig in ons gemeenskap te wees. Jy is hartlik welkom om by enige van hierdie bedieninge in te skakel! Kontak ons gerus as jy meer inligting benodig of saam met ons wil dien tot eer van God.